（刘唱）夜阑人静，大小百家完全勒啦床浪睡，翻身困啦梦里厢。智远命比黄连苦，月黑夜暗看更响。只见一更天气刚敲过，等时辰再敲第二更。阵阵西风吹入骨，飘飘大雪从天降，富贵人踏雪题诗句，我刘智远冰天雪夜思故乡。
（刘唱）恨只恨我父母双亲去世早，孤单飘零在异乡。多蒙李员外抬爱看得起，将心爱之女配鸳鸯。可恨舅兄生性太懦弱，舅嫂势利硬心肠，平日之间说话来讥笑我，我有气总忍耐勒啦肚里厢。伊勿应该骂我偷鸡贼，还要恶狠狠手段对三娘。我实在再也勿能耐下去，狠一狠心肠别三娘，真好像一棒打鸳鸯！
（刘唱）离家来到邠州地，撇下三娘在故乡。记得瓜田分别三娘说身有孕，勿晓得现在阿曾养？说勿定嫂嫂要虐待伊，也作兴拿伊骂与打。三娘呀，并非智远勿顾侬，也是出于无奈无法想。眼前我勒啦邠州千里迢迢要想回去勿能转，欲望娇妻成空想。三娘呀，你我何日再见面，离家总想气来争。含辛茹苦我勿怕，投军杀敌上战场，两军阵前功劳立，就能出人头地姓名扬。
（刘唱）想勿到兵额会得满，派我勒啦此地守夜敲更。勿能到沙场去杀敌，永远埋没我志向。我真像蹲勒啦黑暗里，永世勿能见太阳。要争气偏偏气勿争，叫我有何面目见三娘！
（刘唱）寒风瑟瑟身浪厢衣衫薄，冻得我浑身手脚僵，我迪种苦头自出娘胎从来勿曾受过歇，看上去我性命勿久长。好得花园里厢四下无人在，廊檐底下瞌疏打，让我休息片刻再打更。