（徐白）表妹！
（唱）勿提出灯倒还罢，提起我勒大出灯，讲出来山能高佬海能深。那一日我耽搁勒家庭里，朋友弟兄来仔一大群，说全勒寻我徐阿增。我说寻我为点啥情因，他们说，因为我伲宅浪厢，要想大出灯，叫要我做个发起人。我是情面浪厢难推却，所以我挟元薄写公文，洋钿写着几万块，钞票拎仔一大捆。桩桩样样完全舒齐正，要想出灯仍旧出勿成，因为蜡烛未曾买转门，格末上海跑一逮，蜡烛买仔三十担，装到我伲徐家村，若是侬话勿相信，啥个灯浪啥个戏，啥个戏浪啥古人，忘记灯名勿必说，勿忘记我略表几盏来背灯名。表妹呀，侬晓得我徐阿增岀点啥个灯，让我从头至尾说侬听，叫头排灯勒前头走，二排灯来拉背后跟，盏盏灯浪有戏有古人。前排灯勒前头走，呒没戏佬人，因为擎灯前头走，写勒拉双戤人——徐字擎灯一对前头走，后头要来肃静回避硬牌灯。清道旗灯背后跟，飞虎旗灯跃跃能。叫看一阵又一阵，后头又来一排金锣灯，敲起来是非常好听，劈呖啪啦破声能。
（白）暧！有人要问，金锣敲起来嘭、嘭、嘭响格，侬这个金锣哪能呒没声音格？真的铜做金锣敲起来嘭嘭嘭响格，我这金锣是假的呀，纸头糊拉格，里厢有股气格，所以敲起来末劈啪，破——
（唱）看一阵来又一阵，后头又来一排灯，来仔三十二盏牌名灯，扎成功天地人河，三长四短，夹九夹八，夹七夹五，着末一对野至尊。看一阵来又一阵，后头又来一排灯，来仔三十二盏像棋灯;扎成功将帅士象相，车卒炮马兵，勒拉前头走。后头又来一排灯，来仔十盏灯，十出戏像活格能，一箭仇，二进宫，三岔口，四杰村，五台山，六月雪，七星灯，八尺庙，九江口，十黄金勒前头走。后头又来一排灯，来仔十盏灯，十出戏像活格能，一枝梅大闹宁王府，两横关炮打韩夫人，三锤击走裴元庆，四平山大战老杨林，伍云召起反南阳地，陆地行舟隋炀君，七擒孟获诸葛亮，八锤大闹朱仙镇，九进中原金兀术，十打嘉兴柳树村。看一阵来又一阵，后头又来一排灯，来仔十盏灯，十出戏像活格能，一团和气灯，二龙抢珠灯，三星高照灯，四方平静灯，五子夺魁灯，六国封相灯，七星宝剑灯，八仙过海灯，九节连环灯，着末一盏十里面伏灯。倒转来我要讲侬听，十面埋伏，九节连环，八仙过海，七星宝剑，六国封相，五子夺魁，四方平静，三星高照，二龙抢珠，一团和气灯，灯佬碰，碰佬灯，后头又来一排灯，来仔三十六盏灯，花名生肖是戏名灯，正月里厢梅花灯，扎成功只老鼠灯，眼睛像格胡椒能，尾巴像根彩头绳，戏名五鼠闹东京。二月里厢杏花灯，牛灯倒会垦地种，红孩儿和牛魔王俩做输贏。三月里厢桃花灯，扎成功只老虎灯，老虎出动狂风起，张牙舞爪要吃人，戏名武松景阳岗打虎是有名声。四月里厢蔷薇灯，扎成功只兔子灯，咬脐郎出勒白兔记，白兔会得救娘亲。五月里厢石榴灯，龙灯会得来取水，唐皇屈斩单雄信。六月里厢荷花灯，蛇灯盘来像箬帽能，田鸡蛤斗当点心，白娘娘断桥相会，许汉文边头还有小青青。七月里厢凤仙灯，马灯出趟子，马上骑古人，马腾出世西凉返，杀得曹操难做人。八月里厢木樨灯，羊灯会得咩咩声，老杨颈上一根绳，杨家将八虎同闯幽州城。九月里厢菊花灯，猢狲上树仙桃采，孙悟空大闹南天门。十月里厢芙蓉灯，金鸡会得蝈蝈声，纣王宠爱妲己精。十一月里水仙灯，黄狗灯汪汪汪要咬人，嘿！杨戬得着哮天犬，哮天托在手中心。十二月里腊梅灯，猪猡灯吱哩呜噜叫勿停，猪八戒到盘丝洞里去招亲。看过三十六盏灯，后头又来一排灯，来仔八盏花篮灯，八个仙人活格能，头一个张果老倒骑驴子呵呵笑，汉钟离袒出肩膀露赤身，采和篮里花锦绣，何仙姑手里结莲心，铁拐李药瓢葫芦放出二字天来福。纯阳拔剑斩妖精，韩湘子碧玉笛吹出秋江月，曹国舅独步洋洋出宫门。看过八盏花篮灯，后头又来一排灯，来仔长龙窈窈灯，滴滴滚圆灯，一节一节灯，长龙窈窈冬瓜搭仔番瓜灯，滴滴滚圆西瓜灯，一节一节糖藕灯。看一阵来又一阵，后头又来一排灯，来仔有头有脚灯佬呒头呒脚灯，有脚呒头灯，有头呒脚灯，有头有脚灯，乌龟甲鱼灯，呒头呒脚灯，蚌佬蛤删灯，有脚呒头灯，蟹佬螃蜞灯，有头呒脚灯，鳅佬鳗鲤灯，岀灯出仔一个月，呒没工夫上你门，今年寒里来勿及，待等明年交三春，一定陪你表妹去看灯。